TANNÁR 1996

eg skrivi
súgdjór eru ikki til at stóla uppá
og mannfólk føða livandi ungar

mín fingrasól skínur
mín armkulla skriðar

mítt mánamyrkur er blátt nalvaljós

longri uppi boppur

húð svíður lastisk

sveittablóma stinkar rotið
deodorant

TANNÁR 1997

eg skrivi
grind millum tenn smakkar av ullintum jarni

svartreyður døgurði
smakkar salt
hvalahav

mønustungin ung
tunga tornað

nylonsokkar
lukta trátt

TANNÁR 1997

mamma er ill

ET sigur hon
hevur sett ein tallerk av kókaðari grind
framman fyri mær
og eitt glas av mjólk

eg eri eisini ill
havi einans etið skúmfidusar
í tvær heilar vikur

havi ongantíð verið klænri
havi ongantíð verið meira framúrskarandi

tú vigar for lítið sigur hon
eg sigi eg eri tríggjar centimetrar hægri
enn Descartes var
og mín vekt er fín í mun til mína hædd
eg ætli mær ikki at vera tjúkk

ET sigur hon

eg eti grind og eplir
við ketsjupp og sinopp
drekki kalda mjólk
við grindavreiði

TANNÁR 1998

mamma sigur sjeikur er fittur
men intellektuelt passa tit ikki saman

eg skrivi
fittur ÷ intellektuelt = men

TANNÁR 1998

á Bacalao sker sjeikur flak
frá klokkan morgun til á døgurða

fer inn á vesið við myrkhærdari gentu
og gud viti hvat tey gera har inni siga tey

telefonin ringir í køkinum
sjeikur noktar alt

eg finni gentu í telefonbókini
hon býr á Norðasta Horni

eg koyri út har
í einum bláum Ford Fiesta

genta noktar alt

eg skrivi
góði sjeikur
eg geri tað liðugt
men eg vil gjarna behalda Bufaloskógvarnar
sum tú gav mær
Lív

TANNÁR 1999

í mínum tanka fær hann nýtt navn

eg skrivi
MILKY
skúmandi frískur
søtt flótandi navn

reyðar krúllur
næstan koyrikort

hann kemur við mær heim úr býnum

í sovikamarinum er hann til staðar
sum ein fremmand geografi

hann fer niður
slikkar meg

eg komi

aftaná eri eg deyðamóð

eg biði hann fara
so eg kann sova

TANNÁR 1999

aftaná

misskiljing skilja miss miss muss
hyggja vit eftir City of Angels
við Nicolas Cage og Meg Ryan

áðrenn

kastar hann ein fjarstýrara eftir mær
streyfar mítt avbleikta hár
rakar veggin ikki meg
battaríini sleingjast á gólv

TANNÁR 2000

eg skrivi
nátt blátt skín
meira ljós
meira planet
ella setningar í hagamyrkri

ynski at hann sigur okkurt annað enn
skúlaskipanin er ikki fyri tey av okkum
við serligum gávum

hann býr í kjallara hjá foreldrunum
á bygd

hann fingrar meg
grópar
trýstir

eg føli einki

TANNÁR 2000

eg skrivi
okkurt má glitra meira

solariumshúð
tretivu pluss
glitrar ikki meira

hann suttar mín peikifingur
vil sita við mær í fanginum

eg má heldur fara sigi eg

tú ert meira rationell enn eg eri sigur hann
og ringir eftir einum taxabili til mín

TANNÁR 2000

honum dámar at damur
eru í tennissokkum meðan
hann er í song við teimum

tað sær so klikkað út
at vera í sokkum

eg lati meg altíð úr teimum

tú ert ein egoist sigur hann

tað er ikki tað versta eg eri blivin kallað

Frá bókini “Eg skrivi á vátt pappír” eftir Lív María Róadóttir Jæger.