Bókin Hennar Rödd: Frásagnir kvenna af erlendum uppruna á Íslandi er tímamótaverk sem rammar inn framlag kvenna af erlendum uppruna á Íslandi síðustu áratugi. Konur af erlendum uppruna er sívaxandi hópur í íslensku samfélagi en málefnum þeirra hefur ekki verið veittur nægur hljómgrunnur. Bókin eykur sýnileika þessa hóps og valdeflir konur af erlendum uppruna með því að skapa vettvang þar sem raddir þeirra fá að heyrast á eigin forsendum.

Útgefandi bókarinnar er Vía sem hefur verið vettvangur fyrir marga einstaklinga í jaðarsettum hópum til þess að láta rödd sína heyrast. Vía gefur bókina út í samstarfi við Hennar rödd sem eru félagasamtök sem starfað hafa með það að markmiði að auka vitundavakningu og fræðslu meðal almennings um málefni kvenna af erlendum uppruna á Íslandi. Bókin sameinar hugsjónir beggja aðila sem stefna að vitundarvakningu um málefni jaðarhópa og jafnara, upplýstara og virðingarríkara samfélagi.